«TÜRKMENHOWAÝOLLARY» DÖWLET GULLUGYNYŇ HOWA ULAGLARYNYŇ IŞGÄRLERINI TAÝÝARLAÝAN MEKDEBI

2026/2027-nji okuw ýyly üçin aşakdaky hünärler boýunça talyplyga kabul edýär:

1. Howa menzilleriniň elektrotehniki yşyklandyryş ulgamynyň tehniki taýdan ulanylyşy.

2. Ýangyna garşy goragyň guralyşy we tehnikasy.

3. Awiasiýa howpsuzlygyny üpjün etmek.

4. Howa menzilleriniň radiotehniki enjamlarynyň tehniki taýdan ulanylyşy.

5. Awiasiýada gatnawy guraýyş.

6. Howa ulaglarynyň hereketini dolandyrmak.

 

Mekdebe saglyk ýagdaýy «Türkmenhowaýollary» döwlet gullugynyň lukmançylyk merkeziniň talaplaryna gabat gelýän, umumy orta bilimden pes bolmadyk bilimli, ýaşy 25-den geçmedik Türkmenistanyň raýatlary (oglanlar (harby şahadatnamasy bolan) we gyzlar) giriş synaglarynyň netijeleri boýunça bäsleşik esasynda kabul edilýär.

  Okuwyň möhleti — 2,5 ýyl.

  Howa ulaglarynyň işgärlerini taýýarlaýan mekdepde okuwlar tölegli esasda alnyp barylýar.

  Dalaşgärleriň ýaşy 2026-njy ýylyň 1-nji sentýabryna çenli hasaba alynýar.

  Resmi iş kagyzlary Aşgabat şäherinde 2026-nji ýylyň 13-nji iýuly — 17-nji awgusty aralygynda kabul edilýär.

Resmi iş kagyzlarynyň sanawy:

• bellenilen nusgada mekdebiň direktorynyň adyna ýazylan arza;
• bellenilen nusgadaky sowalnama (anketa);
• bilimi baradaky resminama (asyl nusgasy);
• «Türkmenhowaýollary» döwlet gullugynyň lukmançylyk merkezi tarapyndan bellenilen nusgadaky saglyk kepilnamasy;
• narkologiýa hem-de psihonewrologiýa hassahanalaryndan güwähat;
• soňky okan ýerinden (işlän ýerinden, harby bölüminden) häsiýetnama;
• bellenilen nusgada okuw ukyby üçin tölegi öz wagtynda amal etmegiň kepil haty;
• 3x4 sm ölçegdäki sekiz sany fotosurat;
• işleýänler üçin zähmet depderçesiniň tassyklanan göçürmesi.

Dalaşgärler ýokarda görkezilen resminamalar bilen birlikde, resminamalary kabul edýän iş toparyna aşakdakylary görkezýärler we nusgalaryny tabşyrýarlar:

• pasportyny;
• harby şahadatnamasyny.

Dalaşgär bäsleşiksiz we (ýa-da) okuwa kabul edilmek üçin artykmaç hukukdan peýdalanýandygyny tassyklaýan beýleki resminamalary görkezip biler.

Nädogry berlen maglumatlar we galp resmi iş kagyzlary üçin dalaşgär şahsy jogapkärçilik çekýär.

 Giriş synaglary we okuwa kabul edilmek: Giriş synaglary «Türkmenhowaýollary» döwlet gullugynyň Howa ulaglarynyň işgärlerini taýýarlaýan mekdebinde (Aşgabat ş.) 2026-njy ýylyň awgust aýynyň 20-21-i, 23-i we 24-i günlerinde geçirilýär.

Giriş synaglary ähli hünärler boýunça matematika, fizika, Türkmenistanyň taryhy derslerinden geçirilýär.

Okuw dersleri boýunça giriş synaglary Türkmenistanyň orta mekdepleriniň okuw maksatnamalarynyň esasynda, döwlet dilinde ýazmaça we dilden geçirilýär.

Giriş synaglarynyň tertibinde bellenen wagtynda synaga esassyz sebäplere görä gelip bilmedikler ýa-da dersleriň biri boýunça synagdan geçip bilmedikler soňky synaglara goýberilmeýär.

Giriş synaglaryndan üstünlikli geçen ýagdaýynda, bäsleşiksiz we talyplyga kabul edilmek üçin artykmaç hukukdan «Bilim hakynda» Türkmenistanyň Kanunynyň rejelenen görnüşinde kesgitlenen düzgünlere laýyk gelýän dalaşgärler peýdalanýarlar.

«Türkmenhowaýollary» döwlet gullugynyň Howa ulaglarynyň işgärlerini taýýarlaýan mekdebiniň salgysy: Aşgabat ş., 2089-njy (A.Amanow) köçesi, 17, tel.: 23-34-21.